تـــبــاريـــح

بسم الله الرحمن الرحيم




وش ترجَّى


سبحان ربي كاسي العظم الرميم
باعث عباده للقضا يوم التناد

يا الله يا مذري بقدرتك النسيم
مرسي جباله رافعٍ سبع الشداد

أطلبك يالمولى من الخير العميم
غفران وأرزاقٍ ليا يوم المعاد

قالوا عبادك وش ترجى يالسقيم
قلت أرتجي جزل العطا رب العباد

القادر اللي يحيي العشب الهشيم
اللي كنوزه ما يجي فيها النفاد

الموضوع الأصلي: تـــبــاريـــح || الكاتب: #عـبدالعزيز# || المصدر: منتديات أمل عمري

www.a-3amry.com

أمل عمري

منارة الناسك , نبض الطاولة , نبض الطاولة , نبض الطاولة , فعاليات , فعاليات , حصريات , إيقاع الشعر والنثر , شرفة الذائقة , أسراب الهذيان , مدونات , حكواتي , هودج الأنثى , الرياضه , عيادة الأمل , ومضات الألبوم , همسة العدسة , دروب اليوتيوب , دروب اليوتيوب , دروب اليوتيوب ,

عزي لقلبٍ فارق اليوم الأحباب
وأضحى جداه النوح تال الليالـي

أزريت عن همٍّ فجا قلب منصاب
وأقوت عراص السعد مما جرالـي

بقعا ليا منه رمت قلب بحراب
تلقى على نصله فراق الغوالـي

جتنا صروف الدهْر والدهْر ريّاب
برماح أصلت قلبي اليوم صالـي

قفى أبو خالد بالإيمان مركاب
نحو المنايا لأجل يوم النزالـي

جاه القضا بأرضٍ بها الموت جوّاب
بأرضٍ غريبـة رمل قبره يهالي

بأرضٍ بعيدة عن صحابه والأقراب
يحثى عليه الترب فيها هيالي

فيما مضى من سفره أقول ذا آب
واليوم تحت الترب مرقَدْه طالي

ارجع يابو خالد وأرح قلب منصاب
وأطفال تنشد وين به غاب خالي

خذ من سنيني ما تبي قبل الأنصاب
وابهج كبودٍ صابها اليوم صالي

يالله يا مـروي يبابه بسـكاب
اجعل عدن فيها محط الرحالي

كلٍّ يـزور اللي يوده ويلقاه
واللي أود أزرى فؤادي يلاقيه

عبد الله اللي مات وأقفن مطاياه
وأبقالنا الذكرى ودمعٍ نواريه

مـا قلت أبو بسام بأيام دنياه
واليوم أقوله والثرى ضم محانيه

وإن جوني الوغدان تحكي حكاياه
ثم انشدوني خـالنا وين أراضيه

مضى ثلاثٍ ما رأيـنا حلاياه
يا خالنا شلنا نبي نلتقي فيه

أبكي وأقول الخال يا كود لقياه
مـضى لربه يوم تـمّن لياليه

يوم ابتسم وقتي وضحكت شفاتي
وتــمّت آمالي لفـاها وعدها

قبل الخطوبة جت سهام الشتاتي
أقفت وخـلتني أصالي مسـدها

من يوم ماتت عفت باقي حياتي
وعزي لمن تالي حياته زهدها

يوم ادفنوها قلت هذا مماتي
دوكم سنيني لجْل أجاور لحدها

يا رب ترحمها وتعْجل وفاتي
واتريحني من حسرةٍ طال أمدها

يا دار وين اللي بالأرواح نفديه
أبو ثمانٍ قل بالبيض حلياه

يا دار خشف الريم وينه غدا فيه
قولي لصبٍّ جا من البعد ينصاه

قالت وكن القلب برماح ترميه
خلك رحل يم البصر يم مرباه

رديت والمربى ذواريه تذريه
قلبي عقب عذب النبا مل دنياه

يا ليت عزرائيل جتني مراميه
واللحد ضم الجسم من قبل فرقاه

أقفى فؤادي والمحاديب تتليه
يوم الظعن قدام عيني تمطَّاه

راح الغضي والقلب بالترب ناسيه
هاتوا فتاين واحيوا اللي تمناه

وإن جا وليفي عقب طولة مساريه
والشيب من عقب النضارة تعلاه

قولي أبو بسام لا عاد ترجيه
مرباك ضم اليوم ناحل حناياه

حدر جدار الطين قبره تلاقيه
عند أثلة اللقيا لمن كان يهواه

أول رضيعٍ كلّ عينٍ تراعيه
واليوم حدر الترب والكل خلاه

غدا وحيدٍ دون خلٍّ يواسيه
غير الكفن وأعماله اللي بدنياه

عقب العشر راح الغضي ظبي الأطعاس
وأنحى مظاهيره على شمخ النيب

أقبلت يمه قبْل تقفي بعرماس
أنشد عن اللقيا ودمعي مشاخيب


قالت تدرع بالصبر وافهق الياس
لا بد في يومٍ تزول اللواهيب

وإن احتوتني قبل لقياك الأرماس
يوم الحشر تلقان ما به تكاذيب

وأقفن ضعون الريم مدقوق الألعاس
مع جرهد البيدا على الفطر الشيب

وبعد فرقاي الغضي عذب الأنفاس
غدا الجدا في رقي روس الشخانيب

يابو فهد جتني غرابيل وأتعاس
والجمر كنه بين عوج المحاديب

في دنيتي صاليت الأشجان والباس
وإلى سجان الليل أرقى المراقيب

عمري قضى ما بين هوجاس واعماس
وفراق ربعٍ حاشوا العز والطيب

كم من خليلٍ جاه قصاف الأنفاس
في عز ريعانه طوته المكاتيب

غدا سمير الترب في وسط الأدماس
ثوى وأنا أقنب مثل ما يقنب الذيب

يالله يا مروي صحاصيح دراس
تروي عروقٍ عقب ربعي مجاديب

العزيز

عبدالعزيز

كنت هنا أتنفس

مودتي

الصديق العزيز براق : وسال نهر المسك في هذا المتصفح والسبب تواجدك العذب .

ممتنٌّ أيها النقي .

وأيم الله لبغضي للمتكبر أشد من بغضي للكافر .

صدرتْ -ولله الحمد والمنة- رواية (أرابودس) للمؤلف / عبدالعزيز التويجري .

برّاق معجب بهذا